O Rio Natura Monbus comparte a tarde con escolares da Estrada

Visita ao centro do Rio Natura Monbus

O equipo compostelán da liga Endesa desprazouse ata o Colexio Lourdes, onde os menores, a pesar de que o día era non lectivo, puideron falar cos seus ídolos nun entrañable encontro.

Todos os homes de Moncho Fernández, salvo os lesionados Iñaki Sanz e Oriol Junyent, estiveron, por terceiro ano consecutivo, no centro do municipio galego, nun acto con nenos de todas as idades e multitude de pais. Os pequenos puideron facer todas as preguntas que desexaron aos compoñentes do equipo da máxima categoría nacional, que sentiron todo o apoio dunha afección envorcada nunha semana transcendental porque nela pode quedar logrado o obxectivo da campaña, que non é outro que a permanencia na liga Endesa.

Houbo moitos instantes de alegría entre os alumnos do colexio e foi, sen dúbida, unha experiencia que moitos lembrarán e que outros decidiron inmortalizar con numerosos autógrafos e fotografías cos seus xogadores favoritos.