O IES Paseo das Pontes gaña o II Concurso “Cociñar con Ribeiro”

Concurso Cociñar con Ribeiro

Esta tarde tivo lugar a final da segunda edición do certame “Cociñar con Ribeiro” na aula de actividades-showcooking da 51ª Feira do Viño do Ribeiro, situada na Alameda de Ribadavia. Nela, un xurado multidisciplinar formado polo tesoureiro da Asociación de Sumilleres Gallaecia, Pedro Sestayo, o director da revista Cepas y Vinos, José Ramón Domínguez, o cociñeiro Constantino Iglesias, o director da EVEGA, Juan Manuel Casares, así como o presidente do C.R.D.O. Ribeiro, Miguel Ángel Viso, tivo que valorar a preparación in situ e o resultado das tres receitas finalistas, presentadas polo IES Manuel Antonio, IES de Foz e o IES Paseo das Pontes.

Finalmente resultou gañadora a receita do IES Paseo das Pontes “Cremoso de castañas e chocolate, caramelo de Ribeiro sobre sopa de uva”. Na súa intervención, Constantino Iglesias, que exerceu como presidente do xurado, fixo mención á dificultade na elección do gañador, pois todas as propostas finalistas eran merecedoras desta distinción.

Na súa intervención, Miguel Ángel Viso, agradeceu aos participantes a súa dedicación e a colaboración dos membros do xurado. Amosou ademais a súa satisfacción por ter alcanzado os obxectivos do concurso, dispoñer dun receitario no que o Ribeiro forme parte de cada elaboración, xa sexa como ingrediente ou sirva de inspiración nas súas receitas.

Os integrantes da brigada gañadora recibirán un recoñecemento ante o sector nos vindeiros Premios D.O. Ribeiro que se celebrarán a finais de xuño no Mosteiro de San Clodio.