O Hospital A Rosaleda e SARquavitae organizan unha xornada para tratar aspectos éticos ligados á atención xerontolóxica

O hospital A Rosaleda de Santiago xunto con SARquavitae, plataforma integral de centros e servizos de atención sanitaria e social, organizan este xoves, 15 de maio, unha xornada titulada “Aspectos éticos xerontolóxicos”. A actividade, que terá lugar no Hotel Porta do Camiño de Santiago de Compostela, dará comezo ás 9:45 horas coa inauguración a cargo do Dr. José Manuel Mayán Santos, catedrático de Enfermaría xeriátrica e gerontológica da USC.

A xornada desenvolverase en tres mesas de traballo. A primeira delas, “Ética do coidado” estará moderada polo director asistencial do grupo SARquavitae, o Dr. Josep Pascual Torramade e terá como relatores aos doutores José Ramón Amor, responsable da área de Bioética na Facultade de Ciencias da Saúde da Universidade Rey Juan Carlos de Madrid, que disertará sobre “Imperativo do coidado, ética e calidade do coidado”; e a Rosendo Bugarín, vogal da Comisión Galega de Bioética que tratará os “Malos tratos na persoa anciá”.

A segunda mesa da mañá, “Aspectos legais, atención ao paciente xeriátrico”, estará moderada polo Dr. José María Suárez Quintanilla, presidente do Colexio de Odontólogos e Estomatólogos da Coruña, e terá como relatores ás doutoras Belén Cartimil, de Mutua Galega, e Virginia Alonso Paz, máster en Bioética pola Universidade da Coruña. A primeira abordará a “Incapacidade e os seus aspectos legais” e a segunda a “Lei de dependencia”.

E tras a comida terá lugar a terceira e última mesa “Coidados ao final da vida” moderada pola supervisora da Unidade de Hospitalización da Rosaleda Eva Roma Belmonte. Os relatores serán o Dr. Josep Pascual que tratará o “Modelo Necpal en residencias”; o Due Anxo Ramón López Triguero, do Plan Galego de Coidados Paliativos que falará precisamente sobre estes; Antonio Zacarías López, sacerdote do CHUS, que tratará a “Espiritualidade ao final da vida”, e o Dr. Francisco Javier Barón Duarte, expresidente da Comisión de Ética e Coidados Paliativos do CHUS que exporá o tema das “Instrucións previas”.

Clausúraa, prevista para as 19:00 horas, correrá a cargo de Rafael Silva Agregán, director xerente do grupo hospitalario A Rosaleda; de Gloria García Barreiro, directora da residencia SARquavitae San Lázaro, e de Sergio Quintairos Domínguez, presidente do Colexio Oficial de Enfermaría da Coruña, que colabora na organización do evento xunto co Colexio de Odontólogos e Estomatólogos da Coruña, smith&nephew e a Fundación A Rosaleda.