O Concello de Ourense colabora nas III Miradas con Orgullo que propón un obradoiro e a proxección dunha película

A Concellería de Igualdade do Concello de Ourense, en colaboración coa asociación sociocultural galega “Xaira”, e o cineclube Padre Feijoo, organizan a terceira edición de Miradas con Orgullo, actividades conmemorativas do Día Internacional do Orgullo LGBT (Lesbiana, Gay, Bisexual e Transexual), o 28 de xuño. Constará dun obradoiro que se celebrará ao longo do mes de xuño no Centro Cívico de Colón, e a proxección dunha película na Biblioteca pública.

O Obradoiro “Transgredindo. Construír e nomear o subxectivo: identidades e sexualidade” é un espazo para a participación, o intercambio e a curiosidade en relación ás identidades e á sexualidade. Unha oportunidade para coñecer a metodoloxía do teatro social no enfrontamento dos conflitos, e na posta en común das inquedanzas. Organizarase os martes e xoves entre o 3 e o 26 de xuño, en horario de 17:30 a 20:30 h, no Centro Cívico de Colón.

Todas as persoas interesadas poden inscribirse de balde, ata o próximo luns, 2 de xuño, ou no correo electrónico xaira@xaira.info.

Proxección da película “Tomboy”

O día 30 de xuño proxectarase na Biblioteca Nodal a película “Tomboy”, desde as 20:30 h. Película francesa dirixida por Céline Sciamma, é un drama que trata sobre a infancia, a adolescencia e a transexualidade. Tras instalarse coa súa familia nun barrio ás aforas de París, Laure, unha nena de dez anos, aproveita o seu aspecto e corte de pelo para facerse pasar por un mozo. No seu papel de Michael, verase inmersa en situacións comprometidas. Por exemplo, Lisa, unha moza do grupo, enamorase dela.