O Concello de Ourense activa a tarxeta que permitirá ás persoas desempregadas viaxar gratis en autobus

As persoas desempregadas empadroadas na cidade de Ourense disporán dende xuño da nova Tarxeta Milenio que lles permiriá viaxar gratuitamente no servizo municipal de autobuses do Concello de Ourense. A concelleira de Transportes, Susana Bayo e o técnico desta área municipal, Manuel Díaz, presentaron esta mañá a nova tarxeta, e o procedemento que deberán seguir as persoas interesadas, que deberán estar empadroadas no Concello de Ourense, cunha antigüedade anterior a 6 meses.

Con esta tarxeta, o Concello cumple co acordo plenario aprobado por unanimidade dos grupos políticos municipais a proposta dunha moción presentada polo grupo do BNG.

O procedemento para obter a tarxeta definido pola Concellería de Transportes en colaboración con Novagalicia Banco e Urbanos de Ourense pretende buscar causar as menores incomodidades aos usuarios:

1) Dende hoxe mesmo, de 10:00 a 15:00h poden pedir cita chamando ao teléfono 988 611 611 ou enviando un sms co texto CITA (ESPAZO) DNI (SOMENTES O NÚMERO) ao teléfono 217458

2) Solicitar no Concello o certificado de empadroamento (no Rexistro Xeral, a Oficina municipal da Ponte ou na de Atención ao Cidadán).

3) Acudir o día anterior á cita ás oficinas de emprego (rúa Gómez Franqueira ou Progreso-Xardín do Posío) e solicitar o certificado de estar inscrito como demandante de emprego.

4) Acudir á cita, coa documentación completa: certificados e DNI, ás oficinas situadas nas Burgas, 16, baixo. Esta oficina abrirá de 10:30 a 14:30 horas de luns a venres, a partir do día 4 de xuño. Estará aberta durante un período inicial de 3 meses.

Unha vez realizados estes trámites, a persoa solicitante recibirá a tarxeta no seu domicilio nun prazo de entre 7 e 15 días. As tarxetas terán unha validez de 6 meses.

Novidades nas tarxetas de pensionistas e terceira idade

A concelleira de Transportes tamén presentou o novo perfil das tarxetas milenio para pensionista e terceira idade.

A partir do día 1 de xullo as persoas solicitantes de expedición ou renovación destas tarxetas deberán acreditar que a súa capacidade económica é inferior ao 150% do IPREM (indicador público de renda de efectos múltiples).

Así, deberán presentar por Rexistro unha solicitude que autorice aos técnicos da Concellería de Transportes a comprobar que cumplen este requisito. Co certificado máis o de estar empadroado cunha antigüidade mínima de 6 meses no Concello, copia do DNI, fotografìa e documento que acredite ser maior de 65 anos, para a tarxeta de 3ª idade, e documento expedido pola entidade ou organismo pagador que acredite a condición de pensionista do solicitante, no caso da tarxeta milenio pensionista. Con esta documentación, se dirixirá ás oficinas de Novagalicia Banco para a súa expedición.

Susana Bayo agradeceu a colaboración de todos os grupos políticos municipais, e da Xunta de Galicia para a implantación desta nova tarxeta, así como o traballo dos técnicos da Concellería de Transporte, Urbanos de Ourense e Novagalicia Banco.

A concelleira de Transporte asegurou que Concello e Xunta seguen a traballar no proxecto de transporte metropolitano, co obxectivo de que se poda implantar o ano próximo, e avanzou tamén que o Concello está a preparar un novo prego de condicións para sacar a concurso a concesión de transporte urbano, dado que a actualmente vixente rematará en maio do vindeiro ano 2015.