O 14% dos inscritos no V Congreso de Turismo Industrial-III Crossroads of Europe de Ferrol proceden de país estranxeiros

Os membros dos comités científico e organizador do V Congreso Europeo de Turismo Industrial- III Crossroads of Europe que terá lugar o mes próximo en Ferrol reúnense esta tarde e mañá nas instalacións de Exponav para pechar definitivamente o programa de actividades deste evento.

Durante esta tarde terá lugar o encontro do comité organizador, cunha orde do día centrada, entre outras cuestións, na definición dos contidos do programa final, a composición do Comité de Honra ou a situación actual das inscricións.

Neste senso, cabe sinalar que o prazo de inscrición continúa aberto e que ata o momento suma xa máis de 160 persoas. Delas, un 14% procede de fóra de España, o que reforza o carácter internacional do evento que terá lugar en Ferrol entre o 17 e o 20 de xuño.

Mañá será a quenda do comité científico, encargado de pechar definitivamente o programa e as conferencias. En total, dos 56 relatores, expertos internacionais en turismo, que teñen confirmada xa á súa asistencia, 40 proceden de países da Unión Europea.

Catro sedes e amplo programa de actividades paralelas

O Congreso Europeo de Turismo Industrial-Crossroads of Europe desenvolverase en catro sedes diferentes: o Teatro Jofre, a Fundación Caixa Galicia, a Universidade e Exponav. O seu obxectivo é dar a coñecer as diferentes alternativas ao turismo tradicional a través de experiencias doutros países e de rutas guiadas a través das zonas industriais máis representativas de Ferrol e a súa comarca. Ademais, inclúese un amplo programa de actividades paralelas para todos os participantes.