Miguel Torrecilla continuará no equipo celeste como director deportivo as dúas próximas tempadas

Miguel Torrecilla continuará vinculado ao Real Club Celta. Será director deportivo da entidade celeste as dúas próximas tempadas, segundo o acordo de renovación asinado hoxe polas partes. O equipo vigués pechou este pasado sábado unha gran tempada, a segunda consecutiva en Primeira División, cun meritorio noveno posto, unha posición que certifica o crecemento constante do Celta nas últimas campañas.

Torrecilla chegou ao Real Club Celta na tempada 2009/2010 procedente do Salamanca, onde asumira a dirección deportiva dous anos, e desde entón o conxunto celeste foi mellorando de maneira incesante os seus resultados deportivos. A próxima será, por tanto, a sexta campaña de Torrecilla no club vigués.