Inaugúranse as II Xornadas de Técnicos en Coidados Auxiliares de Enfermaría do IES de Leixa

A Consellería de Cultura, Educación e Ordenación Universitaria, representada polo director xeral de Educación, FP e Innovación Educativa, Manuel Corredoira, participou esta mañá na apertura das II Xornadas de Técnicos en Coidados Auxiliares de Enfermaría (TCAE) organizadas polo IES de Leixa. A iniciativa, que se celebra no Pazo da Cultura de Narón, superou todas as expectativas iniciais, con preto de 350 asistentes, repetindo o éxito da primeira edición (2012).

O encontro ten como obxectivo abordar o papel e responsabilidades dos TCAE en determinados servizos e unidades asistenciais de persoas con características especiais, en servizos ou unidades que empregan métodos e medios materiais e procedimentais específicos, así como en situacións de urxencia e emerxencia como grandes catástrofes. Neste sentido, as xornadas procuran impulsar a formación continua destes profesionais, de tal forma que adquiran as competencias necesarias para dar resposta de forma axeitada ás devanditas situacións.

As xornadas contarán coa participación de expertos dos Complexos Hospitalarios Universitarios de Santiago, A Coruña e Ferrol; así como representantes da Xerencia de Xestión Integrada do SERGAS; e profesorado do IES Leixa (Ferrol), CIFP Ánxel Casal-Monte Alto (A Coruña), IES Agra de Raíces (Cee) e CIFP Politécnico de Lugo.