Fiscalía mantén a petición de 9 anos de inhabilitación para os concelleiros de Santiago

A Fiscalía mantén a petición de nove anos de inhabilitación especial para os sete edís da Xunta de Goberno Local do Concello de Santiago que aprobaron o pago da defensa a outro concelleiro, Adrián Varela, imputado na ‘Operación Pokémon’.

Pola súa banda o avogado dos acusados, Pablo Rodríguez-Mourullo Otero, defendeu a absolución para os procesados e, ao contrario que a fiscal, Aranzazu San José, rexeitou que poida haber unha intención “prevaricadora”.

Paralelamente, á saída dos xulgados o alcalde de Santiago, Ángel Currás, que seguiu practicamente toda a vista co público na sala, entre o que tamén se atopaba o exrexedor Gerardo Conde Roa, mostrou a súa “confianza en que a sentenza sexa favorable” e asegurou que foron capaces de demostrar a súa inocencia.

Ademais, a portavoz do goberno municipal, María Pardo, tamén procesada por suposta prevaricación, asegurou que “sobradamente” foron capaces de demostrar a súa inocencia. A concelleira, que se mostrou cansa tras as case seis horas que durou a vista, afirmou que espera “absolutamente” unha sentenza absolutoria.