Eméndase un vertido ao rego Ameneiral en Ames

Augas de Galicia, ente público pertencente á Consellería de Medio Ambiente, Territorio e Infraestruturas, vén de emendar un vertido de augas pluviais existentes no lugar de Castrigo, Ortoño, no Concello de Ames.

A orixe do foco contaminante realizábase a través dun ramal para o desaloxo de augas pluviais , debido ás conexións incorrectas de dúas vivendas deste lugar.Tras ser detectado polos técnicos do Plan de Control de Vertidos (PCV), en colaboración co Concello de Ames, deuse traslado da problemática detectada aos titulares dos inmobles aos que se lles informou das medidas oportunas para emendar ditos vertidos.

Finalmente, nunha nova inspección realizada, o persoal autonómico confirmou que os titulares procederon á instalación de cadanseu sistema de depuración para o tratamento das augas xeradas nas vivendas antes do seu vertido ao dominio público.