Dispositivo especial con motivo do IX Tríatlon de Riazor

A Concellaría de Tráfico e Mobilidade que dirixe Begoña Freire estableceu un dispositivo para regular a circulación e velar pola seguridade dos participantes no IX Tríatlon de Riazor, que se celebrará mañá, sábado 17 de maio.

A Policía Local, que contará coa colaboración de Protección Civil e dos voluntarios do Servizo de Deportes, pechará o tráfico na avenida de Buenos Aires, entre Barrié da Maza e Calvo Sotelo, a partir das 08.00 horas para permitir a instalación dos boxes da competición.

O circuíto de bicicletas desenvolverase no paseo marítimo, entre a rotonda do Millenium e a rúa Curros Enríquez. Para causar o menor prexuízo á circulación a competición en bicicleta discorrerá polos carrís de circulación pegados ao mar. Os carrís situados ao lado dos edificios habilitaranse, mediante conos, para a circulación de vehículos en ambos os sentidos. Para iso preparouse un dispositivo con 38 membros da Policía Local que regularán as incorporacións nas glorietas e o cruzamento de peóns.