Corenta padexeiros galegos participarán no Campionato de España de Maratón en Badaxoz

O Campionato de España de maratón reunirá este sábado e domingo en Badaxoz a corenta padexeiros galegos en todas as categorías. Iván Alonso, Manuel Garrido, Ton Campos, Diego Romeu, Óscar Graña e Ramón Ferro, todos eles na categoría sénior, forman parte do grupo de favoritos nas distintas especialidades.

A competición durará dous días. O sábado disputaranse as probas individuais. En K-1 a principal referencia será Iván Alonso, do Kaiak Tudense, que ao longo da súa carreira deportiva ha logrado varios títulos mundiais e tamén europeos. Para o tudense é unha das citas máis importantes da tempada.

Na canoa, Ton Campos e Diego Romeu, do Breogán do Grove, Manuel Garrido e David González, do Kaiak Tudense, Borja Gargallo, do Firrete, e David Mosquera, da Ría de Betanzos, constitúen a representación galega. O tres primeiros son os que entran dentro do grupo de favoritos, tal como demostraron nas tempadas anteriores.

O domingo disputaranse as probas de barcos dobres. IvánAlonso e Emilio Merchán, que competirán ambos co Kaiak Tudense, tentarán lograr o título nacional. Antonio Cadeas, Diego Castro, Antonio Palmás e Brais Sánchez, todos eles do Piragüismo Vilaboa, tamén competirán en K-2. En C-2, Ramón Ferro e Óscar Graña, do Kaiak Tudense, son os principais candidatos ao título en xogo. Nesta especialidade tamén estará Ton Campos, que compartirá a embarcación con José Sánchez.

O Campionato de España é unha proba moi importante. Os gañadores terán a praza asegurada para o Campionato de Europa que se disputará en Eslovaquia, no mes de xuño, e tamén o Mundial en Oklahoma (Estados Unidos), en setembro.