Continúa a procura do home desaparecido cando pescaba na Guarda

Efectivos de Salvamento Marítimo e da Garda Civil retomaron este luns os labores de procura de Enrique G.A., que desapareceu o pasado xoves xunto co seu sobriño (cuxo cadáver foi rescatado o domingo), ambos arrastrados por unha onda, cando se atopaban pescando na zona de Punta Bazar, entre os municipios da Guarda e O Rosal (Pontevedra).

Segundo informaron fontes de Salvamento Marítimo, a procura retomouse á primeira hora da mañá deste luns, polos arredores do punto en que Enrique e o seu sobriño Diego foron arrastrados polo mar, con efectivos do Grupo de Actividades Subacuáticas (GEAS) da Garda Civil e o apoio da embarcación ‘Salvamar Mirach’ de Salvamento Marítimo. Así mesmo, despregáronse por terra voluntarios de Protección Civil da zona.

Tío e sobriño, veciños de Tui, foron engulidos por unha onda á primeira hora da tarde do pasado xoves. Unha terceira persoa, que se atopaba nas proximidades e viu o ocorrido, deu a voz de alarma.

Os labores de rastrexo deron os seus primeiros froitos este domingo, cando mergulladores do GEAS localizaron o corpo de Diego G., atrapado polas rocas, preto do lugar onde se produciu a desaparición. A procura continúa este luns, para tratar de atopar ao seu tío.