Catoira vivirá o V Congreso internacional de adestradores de piragüismo en augas tranquilas

Lete Lasa na presentación do congreso deportivo

O secretario xeral para o Deporte, José Ramón Lete Lasa, repasou hoxe algúns dos factores que explican o alto nivel do piragüismo galego nos ámbitos nacional e internacional, destacando entre eles a relevancia indiscutible do traballo que realizan os adestradores.

Lete Lasa lembrou a célebre pirámide do éxito acuñada polo emblemático adestrador estadounidense de baloncesto Johnn Wooden, quen afirmaba que o éxito -no cume da pirámide- baséase na confianza e esta, invariablemente provén da preparación, unha actividade na que o papel do adestrador é esencial. Neste sentido, avogou por coidar ao máximo a “preparación dos que preparan”, co fin de que “os nosos adestradores cumpran a súa función de axudar a obter os mellores resultados, desde a base ata o máis alto rendemento deportivo”. “Creo moi firmemente, -engadiu-, que sen o papel do adestrador os grandes talentos poden non chegar á cúspide da pirámide”.

O secretario xeral fixo estas declaracións na presentación, na Deputación de Pontevedra, do V Congreso internacional de adestradores de piragüismo en augas tranquilas que terá lugar en Catoira (Pontevedra) do 10 ao 12 de outubro deste ano, baixo a organización do Club de Piragüismo As Torres-Romería Vikinga, a Facultade de Ciencias da Educación e do Deporte da Universidade de Vigo, e as federacións galega e nacional de piragüismo.

O titular para o Deporte celebrou os bos resultados acadados a pasada fin de semana polo piragüismo galego no Campionato de España, ao asegurar dez prazas no próximo Campionato de Europa –do 13 ao 15 de xuño en Eslovaquia- e oito no Mundial -do 26 ao 28 de setembro nos Estados Unidos-. Afirmou que “o piragüismo é unha modalidade estratéxica para este país de ríos, rías e embalses, para este país eminentemente náutico que é Galicia”, e lembrou que o mellor deportista da historia do olimpismo español é un piragüista galego, David Cal.

O futuro do piragüismo nos XXOO, no Congreso de Catoira

Este congreso bianual, que entre outros obxectivos busca difundir entre os adestradores desta disciplina deportiva os coñecementos técnicos e científicos necesarios para o desenvolvemento eficaz do seu traballo, reunirá durante tres días a expertos nacionais e internacionais que disertarán ante uns 200 profesionais. Entre os relatores figuran adestradores de Arxentina, Australia, Italia, Hungría, Gran Bretaña e Alemaña.

O último día, o presidente da Federación Internacional de Piragüismo, José Perurena, impartirá unha conferencia sobre o futuro deste deporte nos Xogos Olímpicos, ao que seguirá unha mesa de debate sobre Muller e Igualdade no Olimpismo, que servirá para tratar sobre as modalidades que deben incorporarse na cita de Tokio 2020 co obxectivo de equiparar medallas entre homes e mulleres.