As Travesas acolle este venres o derbi Celta–Dépor de fútbol indoor

O alcalde de Vigo, xunto co adestrador do Celta Indoor, Moncho Carnero, e algúns dos xogadores do conxunto vigués, invitou a toda a cidadanía a participar dun encontro, que de gañarse, podería dar o pase a cuartos de final ao conxunto de veteráns celestes. A cita será este venres, 9 de maio, ás 20,45 da tarde no Pavillón de As Travesas.

Abel Caballero presentou esta mañá o derbi que enfrentará este venres día 9 de maio ao Celta de Vigo co Deportivo da Coruña de fútbol indoor. O rexidor local invitou á participar deste encontro “con entusiasmo e paixón” para acadar o pase a cuartos de final na Liga Fertiberia de fútbol Indoor. Moncho Carnero, o adestrador do conxunto vigués, acudirá ao encontro “sen moitas novidades no equipo” e sinalou que será un partido de “tensión e intensidade”. Recalcou ademáis a xuventude e a boa forma física dos xogadores coruñeses, salientando que é un equipo difícil.

Para o encontro deste venres espérase un cheo absoluto co fin de superar a cifra de 12,000 espectadores que asistiron ao derbi da pasada tempada en Vigo.