Ana de Inglaterra considera crucial a mellora na comprensión da tecnoloxía para a seguridade dos navegantes

A princesa Ana de Inglaterra considerou “crucial” afondar nunha “mellor comprensión” no uso da tecnoloxía para mellorar a seguridade dos navegantes durante a súa intervención na XVIII Conferencia da IAla (Asociación Internacional de Axudas á Navegación Marítima e Autoridades de Faros), que se clausura este sábado na Coruña.

Ana de Inglaterra asistiu este venres a esta conferencia con motivo da conmemoración do 500 aniversario da ‘Trinity House’ organismo responsable das axudas á navegación en Inglaterra e do que é presidente de honra.

No seu discurso, considerou “esencial” o paso “seguro” dos buques e subliñou a importancia da utilización das guías existentes neste ámbito tanto por parte de “cargueiros grandes” coma polas “embarcacións de ocio”.

“Eu son navegante e, por iso, hei de entender un pouco máis as axudas á navegación”, dixo ao remarcar o contido dos relatorios aos que asistiu. Así, aludiu ás “recompensas”, pero tamén “os riscos” do mar, ao tempo que remarcou a importancia da formación neste ámbito.

RISCOS DA NAVEGACIÓN

No seu discurso, fixo balance tamén do traballo de ‘Trinity House’, “con 400 navegantes na nosa fraternidade”, apuntou. Ademais, dixo que, despois de 500 anos, “non cambiou moito”, aínda que si os seus métodos “para avaliar os riscos”. Na mesma liña, subliñou o seu labor social para a axuda a navegantes.

A princesa Ana de Inglaterra incidiu, por outra parte, na importancia de traballar para buscar “novas formas de mellorar a seguridade dos navegantes” e reducir a sinestralidade.

Para iso, apuntou á importancia da colaboración entre países e á innovación, “para utilizar a tecnoloxía do mellor xeito”, engadiu.

Así, sinalou que con “Enrique VIII o mar era máis importante, pero hai que recordar á xente que aínda o mar é moi importante”, afirmou tras recordar que “máis do 90 por cento das mercadorías que entran no Reino Unido fixeron a maioría da súa viaxe” por mar”.

“DÉBEDA DE GRATITUDE”

“É crucial unha mellor comprensión no uso da tecnoloxía”, apostilou sobre a seguridade na navegación. Tamén aproveitou a súa intervención para resaltar a grande débeda de gratitude cos navegantes”. “E debemos axudalos na seguridade”, sentenciou ante os máis de 500 asistentes a esta conferencia.

Tras as súas palabras, o presidente de Portos do Estado, José Llorca, agradeceu a súa presenza e subliñou a “dimensión marítima” de España e Reino Unido, así como a importancia da IAla, “un foro excelente e singular para proporcionar coñecementos expertos ao sector”, engadiu.