Á venda as entradas para o último partido da tempada no Fontes do Sar fronte ao UCAM Murcia

A liga Endesa achégase ao seu fin por esta tempada, mentres que o Rio Natura Monbus xoga as súas últimas citas co obxectivo de permanecer un ano máis nela xa cumprido.  Boa parte dese éxito débello o conxunto ao apoio dos afeccionados abonados que acudiron a todos os partidos en Fontes do Sar, e mesmo viaxaron para apoiar aos de Moncho nas súas visitas por toda España. Como agradecemento a ese compromiso, o club pon á venda as entradas para o penúltimo partido da tempada cun desconto especial para todos eles.

O encontro, que se celebrará o 17 de maio ás 20.00 horas fronte ao UCAM Murcia, será a despedida do conxunto até o próximo outubro da súa afección e do Fontes do Sar, ao ser o último que o Rio Natura Monbus xogará como local. Para esta especial cita, os abonados  poderán comprar tantas entradas  como queiran e onde queiran a un prezo único de 6 euros.

A oferta só está dispoñible en venda anticipada, tanto mediante a páxina web do club (www.obradoirocab.com), como nos dous establecementos físicos da entidade en Santiago: as oficinas do club, situadas no propio Multiusos e con horario de luns a venres e de 10.00 a 14.00 horas, ou a “Miudiño Store”, tenda oficial situada en Área Central (dentro do local Blusens) e con horario de mércores a sábado e de 17.00 a 22.00 horas.

Os prezos xerais para non abonados serán de 35 euros en Tribuna Retráctil, 29 en Tribunas 1, 25 en Tribunas 2 e 19 en Fondos. Tamén se manterán os prezos reducidos de toda a tempada a menores de idade, estudantes menores de 25, maiores de 65 e parados de longa duración. Para eles, o prezo queda en 25 euros Tribunas 1, 19 euros Tribunas 2 e 15 euros Fondos.

No último encontro no Fontes do Sar, os xogadores xa agradeceron á afección o seu apoio constante ao equipo ao longo de toda a tempada. Un apoio que neste último partido traduciuse nunha pancarta dando as grazas a un público que tanto nos partidos de casa como nos desprazamentos demostrou un alento á altura dun reto tan bonito e importante como o da permanencia na liga Endesa.