A Unidade de Branqueo de Capitais de Vixilancia Aduaneira non ve atrasos no pagamento da ORA en Lugo

Un informe elaborado pola Unidade de Branqueo de Capitais de Vixilancia Aduaneira constata a ausencia de “atrasos” no pagamento da xestión da ORA ao Concello de Lugo fronte a que directivos do Grupo Vendex, investigado na ‘Operación Pokémon’, falaban de desculparse co rexedor polos “dous ou tres meses que se lle deben”.

Así consta nun informe incluído entre a trintena de tomos da última entrega do sumario da ‘Pokémon’, no que se sinala que “a empresa adxudicataria deberá presentar liquidacións con periodicidade mensual e dentro dos dez primeiros días do mes” e concrétase que o “importe a ingresar nas arcas do Concello de Lugo é o resultante de aplicar o 20% do canon ao total ingresos”.

Aduanas indican no seu informe que “nalgúns casos” o xustificante de ingreso “reflicte unha data anterior á da aprobación mediante decreto da liquidación correspondente como nos meses de setembro de 2011 en que figura o ingreso de data 8/9/2011, sendo o decreto correspondente á liquidación de xullo aprobado o 28/9/2011”.

“En canto ás incidencias denominadas significativas e, aínda que a priori puidese desprenderse que as incidencias rexistradas nos meses de maio-xullo 2011 derivasen algún atraso no ingreso do canon correspondente ao Concello, compróbase na documentación achegada que os pagamentos se efectuan con normalidade durante todo o ano 2011, seguindo a tónica xeral nos ingresos realizados dende o inicio da concesión”, expón Vixilancia Aduaneira.

Nesta liña, subliña que “non consta mención sobre posibles problemas do cobramento do canon nin atrasos” no pagamento deste por parte da empresa DOAL”. “Tampouco da análise da documentación entregada se desprende falta de pagamento ou atraso no abono do canon estipulado ao Concello de Lugo dende o inicio da concesión ata a data de cumprimento do oficio xudicial en marzo de 2013”, engade.

Ao fío diso, Aduanas precisan no informe, en relación á conversación efectuada o 5 de setembro de 2011 entre o delegado de Vendex en Galicia José María Tutor e o xefe do Grupo, Gervasio Rolando Acosta, que “non se desprende, nun principio, atraso inusual en abono de canon de 20% a Concello de Lugo por parte de DOAL.

Nesa conversación, recollida por Aduanas, Titor dille que ten unha reunión co alcalde de Lugo para falar da ampliación das rúas para o servizo e Rodríguez lle comenta que “de paso dígalle que lle fai falta que lle recollan máis vehículos todos os días porque melloraría a situación da cidade e que, ademais, están a perder diñeiro coas recadacións actuais”. “E descúlpaste polos dous ou tres meses que se lle deben”, engadiu.

“TÓNICA XERAL”

Non obstante, Aduanas desvinculan ese diñeiro debido do servizo da ORA porque “na data da conversación estarían pendentes de pagamento as recadacións dos meses de xullo e agosto”, que serían contabilizadas o 28 de setembro de 2011, “sendo os ingresos en banco o 8 e 13 de setembro, seguindo a tónica xeral de ingresos unha ou dous meses despois da recadación real”.

O informe precisa que “como mínimo, a contabilización da liquidación se realiza ao mes seguinte da recadación á que corresponde, debido aos trámites do expediente”.

Ademais, Aduanas puntualizan que as “discrepancias detectadas entre os importes (Ingresos I) rexistrados en listado de Operacións por terceiro e os importes de recadación obtidos do filtrado e análise dos listados excell achegados puidesen deberse ás denominadas polo Concello incidencias menores reflectidas anteriormente, así como á forma de contabilizar e totalizar as distintas formas de pagamento do sistema ORA”.