A UAD de Monforte forma ao persoal para a realización da proba rápida de VIH

Na UAD de Monforte traballan para ofrecer ás persoas usuarias e á poboación da comarca de Lemos e a súa bisbarra a mellor oferta asistencial. Para conseguilo, este ano incrementan a súa carteira de servizos sumándose ó Proxecto de Detección Precoz do VIH mediante a realización de test rápidos en fluido oral.

Persoal da UAD (enfermeira, traballadora social e educadora social) desprazáronse a Santiago para recibir formación que as habilite para realizar as probas rápidas de VIH.

Neste curso coñeceron os aspectos técnicos sobre a utilización das probas rápidas e anónimas de VIH, así como os protocolos para o seu uso. Así mesmo, melloraron as técnicas de comunicación e relación co solicitante da proba.

As probas realizaranse de xeito totalmente anónimo e coa garantía de que as persoas serán atendidas e asesoradas por profesionais expertos.

Quen debería realizar esta proba?

Todas aquelas persoas que tiveran prácticas de risco para contraer o VIH, como poden ser:

– Os homes que tiveron sexo con homes e que non usaron preservativo.

– As persoas heterosexuais que teñen múltiples parellas sexuais e non usan preservativo.

– As persoas que exercen a prostitución e os seus clientes se non usaron preservativo.

– As persoas que compartiron xiringas e outros materiais para inxectarse drogas.