A Torre de Hércules e a fonte de Catro Camiños ilumínanse de vermello no Día Mundial da Cruz Vermella

O Concello da Coruña informa de que mañá, xoves 8 de maio, colabora no Día Mundial da Cruz Vermella coa iluminación en cor vermella da Torre de Hércules e da fonte de Catro Camiños. Esta iniciativa enmárcase dentro dos actos do 150 aniversario desta institución social en España.

O Concello colabora con Cruz Vermella nun día tan sinalado para esta institución. O Goberno municipal autorizou a solicitude de Cruz Vermella para iluminar mañá xoves dous dos monumentos máis emblemáticos da cidade (Torre de Hércules e fonte de Catro Camiños). Ademais de evidenciar o compromiso do Concello co traballo de Cruz Vermella, esta iniciativa permite situar A Coruña a nivel nacional e internacional, pois Cruz Vermella desenvolve diferentes iniciativas a través das redes sociais con motivo do seu Día Mundial. Así, só en España, a entidade conta con 133.000 fans en Facebook e 8.500 seguidores en Twitter.