A portavoz do goberno de Santiago cre “un erro político enorme” a solicitude de pago de Varela

A portavoz do goberno de Santiago de Compostela, María Pardo, asegurou este luns en sede xudicial que “non era o momento administrativo oportuno” para analizar si se cumprían os condicionantes legais para aprobar o pago da defensa ao edil Adrián Varela, imputado na ‘Operación Pokémon’, aínda que sostivo que a solicitude deste pago foi “un erro político enorme”.

Na súa declaración durante o xuízo por suposta prevaricación contra sete concelleiros de Santiago por este acordo, María Pardo defendeu a súa legalidade e sinalou que a “vontade” do acordo era cumprir estes condicionantes. Así, xustificou que isto non apareza na literalidade do documento alegando que non o redactan os concelleiros, senón técnicos.

Aínda que, na súa opinión, este acordo non foi un “erro”, dado que se remite ao informe do secretario xudicial onde aparecen os condicionantes, María Pardo cualificou de “erro político enorme” a solicitude do pago da defensa.

Ao mesmo tempo, a portavoz do goberno local encarouse co fiscal para rexeitar “prexulgar” ao edil Adrián Varela, e asegurou que considera que os delitos que se lle imputan na ‘Operación Pokémon’ “son no exercicio do seu cargo ata que haxa sentenza”.

Finalmente, Pardo recoñeceu que a súa relación co concelleiro Adrián Varela, ata o momento dos feitos, era “mala”, pero que nestes momentos é “moi boa”.