A Mancomunidade de Ferrol quere que a oficina de fomento do cooperativismo entre en funcionamento no último trimestre deste ano

Os alcaldes que forman parte da Mancomunidade de Concellos da Comarca de Ferrol ratificaron na sesión plenaria celebrada esta tarde a solicitude de achega á Xunta de Galicia para a creación dunha Oficina de Fomento do Cooperativismo. O rexedor ferrolán e presidente da Mancomunidade avanzou que este novo servizo mancomunado prestarase dende o Centro Municipal de Emprego de Ferrol –situado na rúa Sagrada Familia, número 56 (en San Pablo-Catabois); e que tamén disporá de puntos de información nos municipios de Fene e Cedeira.

Co obxectivo de poñer en marcha esta oficina dirixida ao impulso do cooperativismo nos concellos da comarca, o pleno de alcaldes acordou solicitar á Consellería de Traballo e Benestar Social da Xunta de Galicia co obxectivo de que esta financie o 80% desta actuación, presupostada en 26.500 euros. O 20% restante procedería dos concellos que integran a Mancomunidade. Esta contía económica permitiría, entre outras cuestións, a contratación dun técnico para atender o servizo. A previsión do organismo suprmanunicipal é que a nova oficina entre en funcionamento no último trimestre do presente ano.

Noutra orden de cousas, a Mancomunidade recibiu da Deputación Provincial da Coruña a confirmación dunha subvención por valor de 22.000 euros para o novo programa de Deporte Inclusivo. Esta cantidade permitirá sufragar o servizo de transporte adaptado para o desprazamento dos participantes ás actividades, así como parte do custe das memas. O ente supramunicipal ten previsto iniciar o vindeiro mes de setembro a nova temporada da iniciativa de Deporte Inclusivo, en que as persoas con diversidade poderán a Baloncesto e Tenis en cadeira de rodas, Boccia ou Baile adaptado. Inicialmente estas son as actividades que se programarán, aínda que dende a Mancomunidade non se descartan novas propostas no caso de que así o soliciten os destinatarios desta iniciativa.