A iniciativa Máis que comercio! elixe no CCA de Tomiño á carnicería Florentiña como o seu establecemento favorito

Entrega do diploma á responsable da carnicería

A Carnicería Florentiña, situada na rúa A Guarda, foi elixida o establecemento favorito polos participantes na iniciativa Centros Comerciais Abertos. Máis que comercio!, que se desenvolveu durante todo o mes de abril nos establecementos asociados ao centro comercial aberto de Tomiño.

Este negocio familiar, con máis tres décadas de traxectoria, foi o que máis clicks recibiu en www.maisquecomercio.com, web na que os clientes podían participar nun xogo en liña por cada 5€ de compra e optar a diferentes premios ao tempo que elixían ao seu establecemento preferido, chegando a rexistrarse ao longo do mes no espazo de Tomiño máis de 7.000 participacións.

No acto no que se entregaron tanto o diploma ao establecemento máis votado como os agasallos conseguidos polos clientes participou a directora xeral de Comercio, Sol Vázquez, quen salientou que, ademais de resaltar o traballo dos centros comerciais abertos, Máis que comercio! ten por obxectivo resaltar os valores do comercio de proximidade, como son a calidade, o trato ao cliente ou a variedade.

Esta iniciativa da Consellería de Economía e Industria está a percorrer Galicia ao longo deste 2014, desenvolvéndose cada mes en cinco centros comerciais abertos de diferentes localidades galegas.