A I BTTroita de Ponte Caldelas contará con 600 ciclistas participantes

Presentación I BTTroita de Ponte Caldelas

As deputadas provinciais Ana Isabel Vázquez e Begoña Estévez presentaron hoxe no Pazo provincial a I Ruta BTTroita de Ponte Caldelas que terá lugar o vindeiro 18 de maio dentro das actividades complementarias da Festa da Troita, que se celebrará na localidade o 31 de maio e o 1 de xuño. Estiveron acompañadas polo alcalde de Ponte Caldelas, Perfecto Rodríguez, e o representante de Global Deporte Xestión Deportiva, José Víctor Cimadevila.

Será una ruta non competitiva e non federada que transcorrerá  por terreos tradicionais dos Montes de Ponte Caldelas a través de dúas opcións:  unha ruta longa de 38 quilómetros e outra curta de 33 aproximadamente, contando cun desnivel acumulado positivo de 1.044 metros. A ruta de 38 quilómetros contará con alternativas de escape para os que vaian menos preparados, na que os bikers deberán ter unha mínima condición física.

A entrega de dorsais realizarase desde as 8:15 ás 9:15 h e partirase desde a Alameda de Ponte Caldelas ás 9:30 h, con saída neutralizada durante os primeiros quilómetros ó seu paso polo casco urbano. Posteriormente, cada quen poderá ir ó seu ritmo.

Inscrición

No evento, que conta cunha dificultade física e técnica de nivel medio, poderán participar os primeiros 600 inscritos, homes e mulleres maiores de idade (aínda que tamén poderán inscribirse mozos e mozas de 16 e 17 anos coa autorización paterna, que terase que entregar asinada e acompañada de fotocopia do DNI do pai, nai ou titor) logo do pagamento de 8 euros, dos que se destinará 1 euro a unha causa solidaria a favor da Asociación Galega de Afectados pola Esclerose Múltiple Amiotrófica. Todos os participantes deberán levar casco.

Por outra banda, a cita deportiva contará con 2 avituallamentos (adoitados e líquido), lavado de bicis, zona de aparcadoiro, duchas, seguro de responsabilidade civil e asistencia sanitaria, ambulancia medicalizada con médico e ATS, Protección Civil, carpas de diferentes expositores; e entregará agasallos ó grupo máis numeroso, ó participante máis vello, ó participante máis novo e ó participante/grupo que vén de máis lonxe, e sortearanse outros cedidos polos patrocinadores.

A proba, organizada polo Concello de Ponte Caldelas, Global DXT e Roda do Demo coa colaboración da Deputación de Pontevedra, permitirá que tanto participantes como afeccionados poidan percorrer camiños e sendas naturais que grazas a esta proba daranse a coñecer como rutas de sendeirismo para os amantes da bicicleta.

As inscricións poderán realizarse antes do 12 de maio a través da web www.globaldxt.com ou ben fisicamente no Hotel Avenida de Pontevedra.