A Garda Civil remitirá a Madrid as mostras recollidas no club Queens de Lugo

A Garda Civil remitirá ao laboratorio de Madrid as mostras recollidas no club lucense Queens no marco do rastrexo realizado o martes na zona do citado establecemento sobre o que se pivota a investigación da ‘Operación Carioca’ que dirixe o Xulgado de Instrución Número 1 de Lugo.

A inspección, con axentes procedentes de Madrid e A Coruña, concluíu o martes a última hora, coa presenza de “cans de cadáveres”, para a localización de corpos, desprazados de Madrid, segundo informaron fontes policiais.

Aínda que non se atopou “nada”, segundo sinalaron as mesmas fontes, os cans “detectaron” un rastro que, xunto con outras mostras, se revisará no laboratorio da Garda Civil en Madrid. A Policía Nacional e a Garda Civil altérnanse na vixilancia do club, propiedade do principal imputado na ‘Carioca’, José Manuel García Adán.

A vixilancia mantense á espera de recibir “ordes” da xuíza instrutora, Pilar de Lara Cifuentes, que leva a instrución sobre unha suposta trama de prostitución en Lugo na que supostamente estarían implicados membros das forzas e corpos de seguridade do Estado.

Co apoio de axentes de Lugo, o martes peitearon a zona onde se situaba o Queens no polígono industrial de O Ceao oito axentes da Policía Xudicial da Garda Civil procedentes de Madrid.