A Eurocidade Chaves-Verín AECT presente no seminario de xestión en saúde na rexión de Trás-Os-Montes e Alto Douro

O director da Agrupación Europea de Cooperación Territorial Eurocidade Chaves-Verín, Juan Manuel Jiménez Morán, participará como relator no seminario ‘Xestión en saúde na rexión de  Trás-Os-Montes e Alto Douro: que realidades…que desafíos…’, que se celebrará este sábado no auditorio da Escola Superior de Enfermagem de Chaves Dr. José Timóteo Montalvâo Machado.

Durante o relatorio, enmarcado no panel “A saúde na perspectiva do poder local”, o director da Eurocidade Chaves-Verín AECT e tamén alcalde de Verín, explicará o proxecto que se atopa en funcionamento entre os dous municipios transfronteirizos e que ten por obxecto a creación dunha Rede de Referencia Transfronteiriza de asistencia sanitaria mediante a coordinación das actividades dos hospitais de Chaves e Verín -que se desenvolve ao abeiro do acordo marco entre o Reino de España e a República Portuguesa sobre cooperación sanitaria transfronteiriza, asinado en Zamora o 22 de xaneiro de 2009 e no marco establecido pola Directiva 2011/24/UE do Parlamento Europeo e do Consello do 9 de marzo de 2011 relativa á aplicación dos dereitos dos pacientes na asistencia sanitaria transfronteiriza-. Os obxectivos deste proxecto son: asegurar un mellor acceso a unha atención sanitaria de calidade para as poboacións da zona de referencia da Unidade Hospitalar de Chaves e do Hospital de Verín, garantir a continuidade da asistencia sanitaria para devanditas poboacións, optimizar a organización da oferta de atención sanitaria, facilitando a utilización ou a repartición dos recursos humanos e materiais; así como promover a complementariedade dos coñecementos e prácticas, especialmente no ámbito da calidade clínica e organizativa, e da seguridade dos pacientes, innovación e novas tecnoloxías en saúde.

Por este motivo, e co obxecto de acadar devandita Rede de Referencia Transfronteiriza de asistencia sanitaria mediante a coordinación das actividades dos hospitais de Chaves e Verín, se desenvolverán accións como: elaboración dun diagnóstico de asistencia sanitaria actual do campo xeográfico que inclúa os hospitais dos dous municipios, identificar os principais obstáculos e os requisitos necesarios para constituír unha rede de asistencia sanitaria transfronteiriza no campo territorial analizado, definir as orientacións xerais para a organización e desenvolvemento da rede, elaboración dunha folla de ruta coas condicións e modalidades de intervención das estruturas de atención sanitaria e dos profesionais da saúde, e elaborar a proposta de protocolo de cooperación sanitaria transfronteiriza, segundo o acordo marco entre Portugal e España.