A dimisión do edil compostelán produciuse o mesmo día en que foi chamado a declarar pola querela dun sindicato

A dimisión de Adrián Varela (PP) como concelleiro de Deportes do Concello de Santiago produciuse o mesmo día en que foi citado a declarar en calidade de querelado (figura análoga á de imputado nos casos de denuncias), a raíz da querela presentada contra el pola CIG despois de que pedise o despedimento da muller dun sindicalista.

Fontes xudiciais confirmaron que este luns lle “foi notificada” a Adrián Varela a citación para acudir ao Xulgado de Instrución número 3 de Santiago, ás 10,00 horas do 13 de xuño para declarar, en “calidade de querelado” por un suposto delito contra exercicio de dereitos cívicos cometido por funcionario público.

Non obstante, no comunicado remitido aos medios a última hora deste luns, Adrián Varela esgrimía que a súa renuncia era unha mostra de “solidariedade” cos seus compañeiros que sentaron no banco por autorizar a súa solicitude para que o Concello custease a súa defensa na Pokémon, na que está imputado.

No sumario da causa que instrúe Pilar de Lara, aparecen conversacións nas que o ata agora concelleiro pide o “despedimento” dunha traballadora o marido da cal é delegado sindical da CIG.

Varela comunicou este luns ao alcalde de Santiago, Ángel Currás, a súa decisión de dimitir, xusto o mesmo día en que se formalizou esta citación. Este martes, volveu insistir en que a súa renuncia é unha decisión “persoal”, na que non interveu o PPdeG, aínda que recoñeceu que a situación no último ano era “certamente tensa” no Concello de Santiago, onde dez dos 13 concelleiros do equipo de Goberno están imputados.

O ata agora concelleiro de Deportes dixo na súa intervención deste martes ante os medios de comunicación que aínda é “relativamente nova”, polo que non descartou “nun futuro” retomar a “apaixonante” vida política. Agora, apuntou que “chegou o momento de marcar un punto e seguido” na súa vida profesional, “retomar” o seu traballo e proxectos que deixou apartados para concorrer aos comicios locais de 2011 na lista do PP, como un máster.

RECOÑECEU ACTITUDES “REPROCHABLES”

Cando transcenderon as palabras nas que Adrián Varela aludía ao despedimento da muller dun sindicalista, coa apertura dos tomos da Operación Pokémon, o entón edil chegou a admitir actitudes “reprochables”, pero deu por feito que “xudicialmente e penalmente” non terían “maior percorrido” e defendeu a súa continuidade como edil.

Pola súa banda, a voceiro do goberno compostelano, María Pardo, atribuíra esas manifestacións de Adrián Varela, pedindo o despedimento, a un “calentón” do momento, e argumentara que “non se probou” que el “executase” o dito.