A Deputación da Coruña financia dúas ambulancias para as sedes da Cruz Vermella na cidade herculina e Ferrol

A Deputación da Coruña destinará 120.000 euros á compra de dúas ambulancias por parte de Cruz Vermella para as súas sedes situadas na propia cidade herculina e en Ferrol.

A contribución forma parte dun convenio de colaboración asinado entre o presidente da institución provincial, Diego Calvo, e o representante da ONG na provincia da Coruña, Alfonso García López.

Cruz Vermella ten como obxectivo a atención de persoas e colectivos en todo tipo de situacións de emerxencia, e con esta incorporación pretende mellorar o servizo que esta ONG ofrece ás dúas cidades e ás súas áreas de influencia.

Por iso, o representante de Cruz Vermella na zona agradeceu a “contribución da Deputación” e destacou que se trata dun investimento que “chegará aos veciños máis necesitados”.

O custo máximo desta compra, que será asumida en solitario pola Deputación coruñesa, é de 60.000 euros por cada un dos vehículos sanitarios.