A Coruña promociónase en Milán como destino gastronómico de referencia

O Consorcio de Turismo, que preside Luisa Cid, promocionará A Coruña como destino gastronómico en Milán da man de Saborea España, a plataforma turística da que a cidade é membro e cuxo principal obxectivo é impulsar e difundir a calidade e variedade da gastronomía española a nivel nacional e internacional.

O evento, organizado en colaboración coa Oficina Española de Turismo de Milán, celebrarase o xoves, 15 de maio, no espazo enogastronómico Eataly Smeraldo. Estas actividades forman parte da Spagna a Milano que se celebra na cidade italiana do 8 ao 18 deste mes. A Coruña, como membro de Saborea España e baixo a marca Saborea Coruña, participará na acción con outras dúas cidades españolas, Valladolid e Logroño.

A presentación de Turismo da Coruña correrá a cargo do chef coruñés e estrela Michelín Luís Veira, que participará nun showcooking no que elaborará tres pratos: ensalada afumada de sardiña e sandía, zamburiñas con caviar e puré de trufa branca e guisantes con callos de bacallau, trufa e trompetas da morte. Todo iso marinado con viños galegos.

Saborea España está amparada pola Secretaría de Estado de Turismo e presídea o cociñeiro Pedro Larumbe. A entidade está composta pola Federación Española de Hostalaría, a Asociación Española de Destinos para a Promoción do Turismo Gastronómico, a Organización Europea de Cociñeiros e a Asociación de Cociñeiros e Reposteros de España. Máis de 20 cidades forman parte da plataforma, entre elas, Sevilla, Segovia, Madrid, Zaragoza e Valencia.

A presenza de Turismo da Coruña en Milán forma parte das campañas internacionais de promoción organizadas por Saborea España. O pasado novembro, A Coruña mostrou a súa oferta gastronómica ante medio centenar de expertos na Escola Francesa de Gastronomía Ferrandi, en París.