A Coruña acolle o Campionato de España de Bádminton Sub-15

O concelleiro de Deportes, Francisco Mourelo, recibiu esta mañá aos organizadores do Campionato de España de Bádminton Sub-15, que se disputará na Coruña entre o venres,16 de maio, e o vindeiro domingo, día 18 -en concreto, nas instalacións do Club do Mar de San Amaro-. Un total de 110 xogadores participarán nas diferentes categorías do torneo.

O Club do Mar de San Amaro encárgase de organizar esta competición que reúne aos mellores xogadores de bádminton sub-15 de España. Para esta proba están inscritos 110 deportistas de 35 clubs procedentes de 12 comunidades autónomas. A representación galega está composta por catro clubs: Bádminton As Neves e Li Ning-A Estrada (Pontevedra), Athlos (Ourense) e o Club do Mar de San Amaro (A Coruña).

Os xogadores galegos con mellor ranking nacional que participarán neste campionato son Miguel Barbado (Athlos) e Enrique Rodríguez (Club do Mar), números 2 e 9, respectivamente, na clasificación individual masculina; Enrique Rodríguez e Miguel San Luís, do Club do Mar e de Lin Ning-A Estrada, respectivamente, e que ocupan a cuarta posición en dobres masculinos;
e, en dobres femininos, Ana Amigo e Lucía Casal (as dúas do Club do Mar) e María Castro e Noelia Gestoso (Club do Mar e A Estrada), que ocupan a oitava e novena posición, respectivamente.

A competición arrincará coas roldas preliminares o venres, 16 de maio, de 17.00 a 22.00 horas, e continuarán o sábado, día 17, entre as 09.00 e as 21.00 horas. As semifinais e finais das diferentes categorías do campionato disputaranse o domingo, 18 de maio, entre as 10.00 e as 14.30 horas.