Un grupo de veciños do barrio vigués de Teis irrompen nunha rolda de prensa de Abel Caballero

Veciños de Teis irrompendo nunha rolda de prensa do alcalde de Vigo

Varios veciños do barrio vigués de Teis interromperon este mércores a rolda de prensa do alcalde, Abel Caballero, para denunciar publicamente a intención do Concello de Vigo de non incluír nos orzamentos de 2014 unha partida destinada ao centro cívico da parroquia.

Así mesmo, estes veciños, que forman parte da xunta directiva da asociación, criticaron que, con esta medida, o Goberno municipal pretende privatizar este centro e “convertelo nunha empresa”. É “un ataque á asociación, ao barrio e aos veciños de Teis”, apostilaron.

A asociación e o concello crearon un convenio en 2002, con todo, asegurou o secretario, Ángel Iglesias, desde outubro asumiron eles a carga económica das actividades do centro. O pasado ano, o centro contou con 55.000 euros, cos que financiaban cursos e outras actividades.

Por iso, presentáronse con carteis pedindo “Non á privatización da xestión do centro cívico”, “si a participación veciñal” e “polo mantemento do convenio do centro cívico de Teis”. O presidente da asociación, Antonio Collazo, solicitou unha reunión co alcalde xa que, sinalou, “é el o que pecha as portas do concello” e non lles recibe.

O alcalde, que suspendeu a rolda de prensa ata que os veciños abandonasen a sala, cualificou a actuación destes veciños de “antidemocrática”, e censurou que “defenden intereses particulares e queren unha subvención particular”. “Non van conseguir con estas accións unha subvención especial, porque -o que piden- é para eles, non para os veciños”, asegurou.