‘San Juan is back’ contará con 10 días de actividades e un programa “feito co corazón”

O alcalde, Carlos Negreira, acompañado polos responsables de Cultura, Ana Fernández; Turismo, Luisa Cid; e Medio Ambiente, Enrique Salvador; presentou esta mañá o programa de actividades San Juan 2014, que se estenderá entre o 15 e o 24 de xuño, co principal obxectivo de converterse nun referente nacional e internacional e que ten como lema San Juan is back (Volve San Juan): “Trátase de seguir avanzando, de seguir dando pasos. Primeiro, declarouse San Juan festivo; agora, expomos un programa feito co corazón, polo respecto que lle temos á nosa festa máis emblemática”, explicou o alcalde.

Carlos Negreira lembrou que durante dez días A Coruña converterase no referente festivo do noroeste español, destacando que estas festas son ademais o mellor reclamo para impulsar o turismo e, por tanto, a actividade económica. “O obxectivo desde hai anos é que a nosa festa máis emblemática sexa declarada Festa de Interese Turístico Internacional; e consolidar, ou mesmo incrementar, os datos do ano pasado no que 140.000 persoas participaron da noite do 23 de xuño e a cidade alcanzou máis dun 90% de ocupación, o mellor resultado da historia”, explicou o rexedor, quen engadiu: “Ademais, quero destacar que é a primeira vez que toda a área metropolitana comparte os mesmos festivos locais facilitando, entre outras cuestións, a conciliación da vida familiar e laboral”.

Carlos Negreira agradeceu a implicación de todas as áreas do Goberno Local e tamén destacou a importancia da colaboración da Comisión Promotora das Fogueiras de San Juan que desenvolverán un amplo programa festivo durante todo o mes de xuño “con máis de 400 actividades”, destacou Negreira.

Cultura

Así, o alcalde informou sobre algún dos aspectos máis destacados da programación marcada pola música, as actividades infantís e a dinamización nos barrios que compartirán protagonismo coa tradicional cabalgata, a queima de fallas ou o disparo pirotécnico. “Traballamos para que cada ano podamos vivir máis San Juan; é dicir, máis música, máis actividades infantís e máis festa nos barrios para que todos vivan San Juan con intensidade”.

As actividades arrincarán o domingo, 15 de xuño, co tradicional Día do Deporte na Rúa; sardiñada popular e verbena no parque de Santa Margarita; e San Xoan Pequeniño, que comeza nesta zona para trasladarse, cada día e ata o 24 de xuño, a distintos barrios da cidade.

Ademais, o Goberno local volve apostar nesta edición por grandes concertos en espazos emblemáticos da cidade. Así, a praza de María Pita recibirá a Los Secretos, o xoves 19; e a Nacha Pop, La Unión e Los Limones, o venres 20. O Paseo de Riazor acollerá un gran espectáculo a noite de San Juan con Afasto Stivel (Tequila), Seguridad Social e Danza Invisible; e o parque de Santa Margatita volverá converterse na sede do Bipolar Fest (do 20 ao 22 de xuño), que este ano se prolongará durante 3 días. Ademais, San Juan, e en concreto o Palacio da Ópera, será o protagonista dun espectáculo pioneiro: unha ópera folk a cargo da Orquestra Sinfónica de Galicia e Luar na Lubre (20 e 21 de xuño).

Turismo

O alcalde tamén explicou algunhas das campañas que se porán en marcha desde a área de Turismo para a promoción da festa, pondo especial nos dous principais mercados: Portugal e España. “Ademais, San Juan aparecerá nas revistas das compañías que operan desde Alvedro; e Globalia publicitará estas festas nas súas 1.500 oficinas, avións e redes sociais”, explicou o alcalde.

A campaña de turismo incluirá ademais a creación de dossieres, a inclusión en publicacións como a revista #coruñasemueve cuxo número se dedicará a estas festas, a presenza en redes sociais ou a través de newsletter. Ademais, porase en marcha unha campaña de posicionamento online que inclúe distintas estratexias como a presenza en redes sociais para a promoción nacional e internacional destas festas.

Doutra banda, contarase coa páxina web www.corunaespiritudefuego.com e o vídeo de San Juan distribuirase a través das redes sociais, oficinas de viaxes e en voos con pantalla en castelán, galego, inglés, francés, portugués, alemán, italiano e ruso. “Este traballo recolle á perfección ese espírito de lume que ten a cidade e que estala a noite do 23 de xuño”, explicou o alcalde, quen destacou a elección dos Esquizos para a confección da banda sonora.

Medio Ambiente e Seguridade Cidadá

Desde a Concellaría de Medio Ambiente prepárase un dispositivo para que os cidadáns, veciños e visitantes, poidan gozar da praia o día 24. Ademais, o rexedor lembrou que, tras o éxito do ano pasado, nesta edición consolídase a experiencia de repartición de madeira limpa para incentivar que os cidadáns depositen o lixo xerado en sitios habilitados respecto diso. “Pasamos dun programa piloto a unha aposta segura que se traduce nun San Juan cada vez máis sustentable. Multiplícase por seis a madeira que se repartirá: 150 toneladas fronte ás 25 que se entregaron o ano pasado. Nesta ocasión, ademais de na praia de Riazor, a iniciativa estenderase aos areais de Oza, San Amaro, Matadoiro e Orzán”, informou Negreira que explicou que se instalarán 10 colectores para a recollida de lixo, un 43% máis que en 2013. “Ademais
-continuou- outra das novidades deste ano é que, ademais dos 34 aseos portátiles que se colocarán ao lagro do Paseo Marítimo, tamén se instalarán 12 nos areais: 8 na Coraza -4 a cada lado- e 4 nas proximidades da rampla de acceso a cálea Sol”.

Respecto ao dispositivo extraordinario de Seguridade, o alcalde sinalou que estará integrado por 280 efectivos entre Policía Local, Policía Nacional, Garda Civil, Bombeiros, Protección Civil e voluntarios, ademais da Unidade Especializada en Rescates Marítimos que se puxo en marcha o ano pasado para dotar aos areais de maior seguridade e atallar de forma máis rápida posibles accidentes.

“A lema deste ano resume á perfección o sentimento que provoca a nosa festa por excelencia. Volve San Juan, volve a noite máis desexada e máis máxica; a noite onde A Coruña ilumina ao mundo”, concluíu.