Ricardo Guillén: “Veño ilusionado a un proxecto de moito mérito”

A última fichaxe do Rio Natura Monbus, Ricardo Guillén, foi presentado esta mañá no Pazo de Altamira en compañía do conselleiro, Argimiro Fernández, e do director xeral do club, Jose Luís Mateo. Guillén chega “ilusionado” e busca coñecer o xogo do equipo o máis rápido posible. Esta á-pivote de 37 anos e 2,05 metros acaba de incorporarse ás ordes de Moncho Fernández, un adestrador co que xa coincidiu na súa etapa en LEB e co que está encantado de reencontrarse.

Argimiro Fernández, comezou a rolda de prensa agradecendo ao Pazo de Altamira o seu involucración no proxecto obradoirista, e para iso, lembrou aos medios de comunicación alí presentes que “a semana pasada presentabamos un Estudo da Universidade de Vigo no que, entre outras interesantes conclusións, reflectíase que a hostalaría é o sector máis beneficiado economicamente coa presenza do Rio Natura Monbus na ACB. E isto o Pazo de Altamira sóuboo ver desde hai tempo, do mesmo xeito que moitas outras empresas de toda Galicia”, apuntou.

O directivo ten claro que a predisposición do filial do Unicaja foi clave para poder levar a cabo esta operación anunciada de forma oficial o pasado sábado pola noite. “Gustaríanos agradecer publicamente ao Instituto de Fertilidade Clínicas Recuncho as facilidades mostradas para que o xogador puidese cumprir o seu desexo de xogar no Rio Natura Monbus”, declarou. Argimiro tamén fixo fincapé nas ganas do xogador en asinar o contrato de dous meses que se lle ofrecía desde a capital galega e que finalmente aceptou despois do beneplácito de todas as partes. “Tamén foi moi importante o interese que Richi Guillén puxo en incorporarse ao noso equipo”, terminou.

Pola súa banda, o director xeral do Rio Natura Monbus, José Luís Mateo, comentou que “A falta de efectivos que sufrimos no último mes restou competitividade ao equipo, tanto nos adestramentos como nos partidos. Coa incorporación de Richi sumamos unha axuda que necesitará pouco tempo de adaptación grazas á súa experiencia, intelixencia, calidade e coñecemento do modelo do equipo”, comentou.

Pola súa banda, a última fichaxe do Rio Natura Monbus, Ricardo Guillén, comezou recoñecendo que está encantado en volver coincidir co técnico do club Moncho Fernández. “Coñezo a Moncho, sei a súa maneira de xogar, teño boa relación con el. Realmente iso era un condicionante moito maior para poder saír de alí, onde estaba cómodo e tiña unha vida tranquila”, indicou. “Cambiou algunhas cousas, evolucionou. Máis ou menos coñézoo ben, se como é, o baloncesto é esixencia e ao nivel en que está o Obradoiro a esixencia é maior”, engadiu na rolda de prensa da súa presentación.

O xogador quere “axudar ao equipo” en todo o que se lle pida, pois sabe que a súa chegada se debe ás múltiples baixas e espera suplilas canto antes, pois restan nove partidos até o final da fase regular. “Cheguei aquí porque había uns problemas de lesións e puidéronse facer os trámites debido a que a liga onde a que xogaba termínase este venres. Para min é unha ilusión estar aquí, veño axudar a un proxecto que está avanzado e que ten moito mérito”, subliñou.