Rey Varela pide a Navantia que permita a entrada dos familiares dos traballadores que continúan encerrados

O alcalde de Ferrol, Jose Manuel Rey Varela, enviou hoxe unha carta ao presidente de Navantia, Jose Manuel Revuelta Lapique, en que traslada a preocupación dos voceiros dos grupos municipais pola situación  dos traballadores da empresa auxiliar Atenasa, pechados dende fai catro semanas. De acordo coa decisión da Xunta de Voceiros e tras entrevistarse con familiares dos traballadores, o primeiro edil da cidade diríxese ao máximo responsable de Navantia en Madrid para que permita a entrada dos familiares dos dous empregados de Atenasa que seguen encerrados no interior da factoría ferrolá.

Na misiva, Rey Varela manifesta a súa preocupación como alcalde ante esta situación e pídelle ao presidente de Navantia que “permita a entrada dos familiares dos dous traballadores encerrados, pois se vai cumprir un mes sen que as súas mulleres e fillos puideran manter contacto persoal algún”.