Puertas de Galicia participará na Feira do Lázaro

Durante o fin de semana do 05 e 06 de abril, o Plan de Competitividade Turística Puertas de Galicia estará presente na Feira do Lázaro e Certame Gastronómico ‘Vila de Verín’, que se celebra no Pavillón Municipal de Deportes de Verín.

O stand do PCT Puertas de Galicia ofertará aos/ás visitantes información sobre as comarcas Monterrei e Conso-Frieiras, mediante o reparto de guías do territorio, mapas e información dos establecementos de hostalaría e restauración; así como patrimonio cultural e festivo. Por outra banda, o apartado gastronómico contará cunha importante pegada a través da presentación do proxecto ‘Catro Estacións Gastronómicas en Portas de Galicia’  (destinada a potenciar a oferta enogastronómica das comarcas de Verín e Conso-Frieiras como atractivo turístico da zona ao longo de todo o ano, e do que xa se está a preparar as Xornadas Gastronómicas de Primavera, que permitirá que moitos restaurantes das dúas comarcas oferten menús de tempada a prezos aptos para todos. Con todo, non se poden esquecer outros recursos como as novas rutas de sendeirismo, o Centro BTT Puertas de Galicia (situado na fronteira entre Galicia, Portugal e Castela-León, e conta cun total de 244 quilómetros, divididos en doce rutas sinalizadas, nove circulares e tres de conexión), ademais dos recursos vitivinícolas da Denominación de Orixe Monterrei.

O Plan de Competitividade Puertas de Galicia está promovido por Turespaña, Secretaría Xeral para o Turismo da Xunta de Galicia e once municipios (Cualedro, Laza, Monterrei, Oímbra, Riós, Verín, Vilardevós, A Gudiña, A Mezquita, Viana do Bolo e Vilariño de Conso), integrados na Asociación de Municipios para o Plan de Competitividade Turística das comarcas de Monterrei e Conso-Frieiras, e a Asociación de Empresarios de Turismo e Hostalería Puertas de Galicia. Entre os obxectivos deste plan están a busca de especialización tanto no destino como no produto, deseñar unha oferta capaz de introducir a experiencia turística como elemento motivador da viaxe, así como a busca da mellora da competitividade das PEMES e MPEMES turísticas para lograr a sostenibilidade do territorio.