Povisa apoia a Carlos Pérez Rial ‘Perucho’ na carreira cara ao Campionato Mundial de Piragüismo

Povisa asinou co laureado piragüista Carlos Pérez Rial, Perucho, un contrato de patrocinio co que pretende apoialo de cara ao próximo Campionato do Mundo que se celebrará o próximo mes de agosto en Moscova.

Pérez Rial é un dos deportistas galegos máis importantes de todos os tempos. Entre o seu extenso palmarés, destaca a medalla de ouro nos Xogos Olímpicos de Pequín nos 500 m. de K2 e o Campionato do Mundo en 2005 de K1 e 200 m. Foi Subcampión de Mundo de K1 en 2003 e 2006, e en 2008 foi nomeado Mellor Piragüista Español do Ano e Mellor Deportista Galego do Ano, ademais de recibir a Medalla de Ouro ao Mérito Deportivo.

En virtude do acordo alcanzando con Povisa, Pérez Rial levará a marca do hospital nas súas pas e nos costados da súa embarcación tanto no mundial de Moscova como no Campionato de España que se celebrará unha semana despois en Trasona (Asturias), e no Campionato de Europa que se celebrará en Brandeburgo (Alemaña) entre o 11 e o 13 de xullo deste ano. Ademais, Pérez Rial poderá realizar en Povisa as análises e probas médicas que precise.

Durante a firma do acordo, o conselleiro delegado de Povisa, José Bernardo Silveira, destacou os valores de esforzo e afán de superación que representa Carlos Pérez Rial, e o feito, ademais, de que resida en Cangas do Morrazo, un concello de referencia para Povisa por canto a súa poboación está adscrita ao hospital.