Panos ao vento na Ría de Vigo con 300 barcos no VII Trofeo Granitos Ibéricos

A Ría de Vigo lucirá este fin de semana panos ao vento, os das 300 embarcacións que tomarán parte na VII edición do Trofeo Granitos Ibéricos que organiza o Club Marítimo de Canido. Evento de transcendental relevancia no noroeste peninsular, servirá de vínculo entre dous países tan próximos como España e Portugal, unidos polo deporte da vela lixeira, nun ano no que o club de Canido celebra os seus 45 anos de historia.

As inmediacións da Praia de Samil e das Illas Cíes serán o atractivo visual onde estarán situados os dous principais campos de regata, o primeiro para os máis pequenos da vela infantil, os Optimist para as categorías A, B e C. O segundo para outras tantas do Láser, o Standard, 4.7 e Radial, co mesmo horario de saída para a primeira proba do día, as 14.00 horas. Debido ao elevado número de embarcacións participantes a rampla do porto de Canido comezará a deslizar barcos dúas horas antes.

Todo o contorno do acceso a Canido estará valado a partir das 8 da mañá do sábado, facilitando unha ampla zona de espazo loxístico que estará controlado pola Policía Local de Vigo e Protección Civil.

Unha trintena de clubs tomarán parte nesta VII edición do Trofeo Granitos Ibéricos, declarada Campionato Ibérico de Optimist e Láser pola Real Federación Española de Vela e pola Federacion Portuguesa, nunha cita que conta coa colaboración da Xunta de Galicia, Deporte Galego, Portos de Galicia, Concello de Vigo, Proteccion Civil, Policía Local, Coca Cola, Sailway, GADIS, Tuypan e Bicasco.

Unha das actividades complementarias da regata será o concurso de destreza na condución de remolques, na que os adestradores e adestradoras dos equipos da gran cita velística, terán que demostrar as súas habilidades nun circuíto pechado con diversos obstáculos, e que o pasado ano levantou expectación. Esta proba realizarase ao termo da primeira xornada, mañá sábado ás 20.00 horas.

A segunda das actividades, aberta ao público en xeral, é o concurso fotográfico que, en tres categorías, premiará as mellores fotos do VII Trofeo Granitos Ibéricos. As temáticas son marítima, área e terrestre, as dúas primeiras con tres premios de 150 euros para o primeiro, 75 para o segundo e 25 para o terceiro clasificado ou clasificada. Na terrestre haberá dous premios, un de 100 euros para o vencedor e outro de 50 para o segundo clasificado. Os vencedores daranse a coñecer o domingo, tras o termo da regata.

A casualidade no calendario de regatas galego fará da Ría de Vigo unha xornada extraordinaria, ao coincidir ao seu paso a travesía costeira que un bo número de cruceiros realizarán entre Vigo e Baiona, dentro da IX Regata de Inverno – Trofeo Generali que abre a tempada do Monte Real Club de Iates de Baiona, contorna ao catro da tarde, provocando un momento único de mestizaxe entre a vela lixeira e a pesada.

A previsión meteorolóxica para este primeiro día anuncia vento do oeste, sen choiva e cunha intensidade mantida nese eixo de 12 nós, condicións ideais para a navegación.