Os emprendedores ourensáns descobren os instrumentos e servizos de apoio ás novas iniciativas empresariais

Rogelio Martínez na visita á CEO

O director do Igape, Javier Aguilera, e o delegado da Xunta en Ourense, Rogelio Martínez, participaron hoxe na apertura dunha xornada técnica destinada a informar dos diferentes servizos e instrumentos de apoio e asesoramento para facilitar a posta en marcha de novos proxectos ou o desenvolvemento e a consolidación de novas iniciativas empresariais que achega a Xunta aos emprendedores ourensáns a través da Unidade Galicia Emprende.

O delegado da Xunta recordou a recente entrada en vigor da Lei do Emprendemento, chamada a xerar un marco favorable para a creación e a consolidación de novas empresas, para aproveitar ao máximo o talento do capital humano de Galicia; unha norma que se concibe, segundo salientou Rogelio Martínez, para dar máis facilidades e achegar máis financiamento ás persoas que decidan converter unha idea nun proxecto empresarial.

Aguilera Navarro, pola súa parte, lembrou a activación da Unidade Galicia Emprende como un instrumento de especial valor para achegar a cada proxecto os servizos e os apoios que poden serlle de maior utilidade, e informou das diferentes convocatorias abertas de apoio financeiro a emprendedores. Entre elas, o director xeral do Igape destacou o programa Galicia Emprende, disposto para conceder axudas que poden cubrir ata o 50% dos proxectos con investimentos comprendidos entre os 35.000 e os 500.000 euros.

O prazo para a presentación de solicitudes ao abeiro deste programa rematará o próximo 30 de abril, e os proxectos de investimento en Ourense poden acadar maiores apoios ao abeiro do Impulsa Ourense. O programa compleméntase cos fondos de capital risco preparados para apoiar proxectos de novos emprendedores ou proxectos con especiais compoñentes innovadores.

Na xornada Galicia Emprende desenvolvida esta mañá na sede da Confederación Empresarial de Ourense participaron o presidente da CEO, José Manuel Pérez Canal, e o presidente do Círculo Xoves Empresarios de Ourense, Luis Babarro. Ademais, nunha mesa redonda sobre a experiencia de emprender participaron tamén as emprendedoras Rosa Carballo, de Kids&Us, e Alba Adá, de Goal Comunicación.