Os corpos recuperados do naufraxio de Vigo corresponden a un mariñeiro marroquí e dous galegos

Os tres corpos sen vida recuperados tras o naufraxio do pesqueiro ‘Mar de Marín’ na ría de Vigo foron identificados como un cidadán de nacionalidade marroquí e dous galegos, segundo informaron fontes de Salvamento Marítimo.

Pola súa banda, os dous tripulantes que permanecen desaparecidos tras afundirse o arrastreiro son un mariñeiro natural de Ghana e outro de Galicia, segundo apuntan as mesmas fontes.

En canto aos cinco pescadores que foron rescatados con vida, todos galegos, entre eles atópase un observador pesqueiro dunha empresa subcontrata do Instituto Oceanográfico de Vigo que ía a bordo do ‘Mar de Marín’.

A procura dos desaparecidos conta por aire cos helicópteros ‘Pesca 1’, dependente da Xunta, e ‘Helimer 203’, de Salvamento Marítimo.

A eles súmanse efectivos de Protección Civil por terra, entre outros medios despregados, que ata agora centraban a procura na zona de Cabo Home e Barra, en Cangas do Morrazo (Pontevedra). Con todo, segundo informaron fontes deste corpo, a área de rastrexo ampliouse ata a zona das illas Ons, debido á influencia das correntes mariñas.

Por mar, colaboran as embarcacións ‘Salvamar Mirach’, ‘María Pita’, ‘Serra Barbantes’, ‘Ría de Vigo’, unha da Garda Civil e outra de Vixilancia Aduaneira, así como varios pesqueiros que estaban na zona.

As tarefas de rescate dos dous mariñeiros desaparecidos están a ser coordinadas polo Centro de Salvamento Marítimo de Vigo, dependente do Ministerio de Fomento.