Os Coribantes de Buchabade e Grupo Moldes entregan uns 2.000 quilos de alimentos a servizos sociais de Ponte Caldelas

Membros de Os Coribantes de Buchabade e unha directiva do Grupo Moldes fixeron entrega aos Servizos Sociais do Concello de Ponte Caldelas uns 2.000 quilos de alimentos non perecedoiros reunidos no Concerto Solidario celebrado no auditorio da Cidade Infantil Príncipe Felipe da Deputación de Pontevedra e nos Supermercados Moldes durante a Operación Quilo levada a cabo por este colectivo cultural.

O encargado de recepcionar este donativo foi o propio alcalde de Ponte Caldelas, Perfecto Rodríguez, e funcionarios de Servizos Sociais que agradeceron este xesto solidario que servirá para atender a necesidade daquelas familias, residentes neste municipio, que se atope en situación de emerxencia social e que cumpran cos requisitos e criterios técnicos adecuados para ser beneficiarios destas axudas alimenticias.

“Hai que ter en conta que as necesidades de moitas familias mantéñense todo o ano e non só en Nadal, por iso é necesario contar con alimentos suficientes para que a través dos Servizos Sociais podamos facer entregas periódicas ao longo do ano a determinadas familias”.

A gran maioría destes alimentos non perecedoiros, un total de 5.000 quilos en toda a campaña, foron recadados na súa gran maioría a través de donativos solidarios realizados polos propios clientes de Supermercados Moldes e entre os artigos entregados destacan pasta, arroz, lentellas, garavanzos, galletas, azucre, etc.

CREAR A FIGURA DO VOLUNTARIADO SOCIAL EN PRÓXIMAS EDICIÓNS DA OPERACIÓN QUILO

Dado o éxito alcanzado nesta edición e o ofrecemento de moitos mozos para participar nesta iniciativa leva aos organizadores deste evento solidario a pensar en crear a figura do “Voluntario Social” para próximas edicións da Operación Quilo co fin de que dinamicen e incentiven a doazón nos distintos supermercados colaboradores pertencentes ao Grupo Moldes na provincia.

Esta acción solidaria, promovida por Os Coribantes de Buchabade, en colaboración co Concello de Ponte Caldelas, a Deputación de Pontevedra e Supermercados Moldes, tivo lugar o pasado 28 de decembro coa celebración do VIN  Concerto Benéfico Quilo Solidario no que participaron os cantautores Raúl Cabaleiro e Bernardo Xosé; o grupo de pandereteiras de Ames As Maianas e o propio grupo de gaitas Os Coribantes, acompañados por Jesús Alonso, Juan Viñas e Silvia María, entre outros artistas colaboradores.