Os cativos mosenses aprenden hábitos responsables para o coidado dos montes

Explicacións sobre o coidado dos montes aos pequenos de Mos

A concellería de Educación e Participación Cidadá, dirixida pola edil Kely Monzón, informou de que xa se levou a cabo a actividade Coidado do Monte para os cativos de 5º e 6º cursos de Educación Primaria dos colexios do municipio Mestre Martínez Alonso (Castro-Mos) e Pena de Francia, que puideron participar nesta iniciativa onte, 28 de abril, e hoxe, 29 de abril, nos seus respectivos centros educativos.

“Coidado do Monte pon de relevancia o coidado do noso entorno natural co fin de promover e fomentar hábitos responsables para o mantemento axeitado dos nosos montes, destacando a importancia de respectalos e coidalos” declarou a edil Kely Monzón.

A devandita actividade, que contou coa colaboración dun axente forestal especializado do distrito do Baixo Miño, abordou temas como os valores e os beneficios do monte, como colaborar no seu coidado ou informar do persoal que traballa nel e cales son os perigos resultantes dos malos hábitos ou os despistes.

O obxectivo de Coidado do Monte foi o de concienciar ós rapaces participantes sobre os ricos e os problemas que levan consigo os incendios forestais, e os seus efectos negativos, ademais de facilitar os coñecementos adecuados para que os pequenos adquiran hábitos responsables no coidado do monte e maila importancia do seu mantemento.