“OIL&GAS. Oportunidades de negocio para o sector metalúrxico galego” en ASIME
A Asociación de Industriais Metalúrxicos de Galicia (ASIME) celebrou hoxe unha xornada sobre “Oil& gas. Oportunidades de negocio para o sector metalúrxico galego”, na que participaron relatores nacionais e internacionais e analizáronse as distintas formas de entrada ao mercado mundial dos hidrocarburos.
Os relatores da xornada foron Xavier Sánchez Incera e Léa Desailly, da compañía francesa MARÉAL Engineering, António Ferreira Pereira, da portuguesa GALP ENERXÍA SGPS, Alberto Igrexas González, de METALSHIPS & DOCKS, e Adolfo Lamas Rodríguez, de NAVANTIA.
Durante a xornada analizáronse as principais formas de entrada ao mercado de oil& gas, así como os diferentes deseños de subestructuras offshore, plataformas e embarcacións que se están utilizando hoxe en día. Así mesmo, os relatores remarcaron cales son as novas áreas de exploración que existen actualmente e as previsións de evolución desta industria para os próximos anos.
Os representantes da empresa MAREAL sinalaron que a concepción, a enxeñaría básica e a enxeñaría de detalle son etapas fundamentais no deseño de estruturas off-shore.
Adolfo Lamas, responsable comercial de Navantia, destacou que Navantia ten grandes oportunidades no sector Oil&Gas, tanto pola experiencia coa que contan, como pola localización estratéxica e os medios técnicos das súas instalacións.
Alberto Igrexas de MetalShips destacou que están nun proceso de recuperación da confianza dos investidores e manifestou unhas boas perspectivas de futuro para o sector off-shore que, ademais do prezo, esixe uns parámetros fundamentais como seriedade, calidade, cumprimento de prazos e flexibilidade.
Os representantes de GALP ENERXÍA resaltaron que os desafíos para as empresas que traballen no sector Oil& Gas son a especialización, cunha calidade auditable, a internacionalización e as colaboracións entre empresas.
A actividade de oil & gas engloba os produtos e servizos relacionados coa industria petrolífera e gasera, como a construción e conversión de buques para a exploración, perforación, produción, instalación e mantemento de campos offshore.
As empresas ligadas á cadea de valor dos hidrocarburos coinciden en que 2014 é un ano mellor que os anteriores. En termos xerais, espérase até 2035 un investimento de 9.5 billóns de dólares para a industria gasera e de 10 billóns de dólares na área de extracción, produción en terra e mar, transporte, almacenamento e refino.
ASIME confía de maneira decidida na internacionalización e na procura de novos mercados como vía para superar a situación adversa que viven neste momento algunhas actividades do sector metalúrxico, por exemplo, as estruturas metálicas, fabricantes de equipos, fabricantes de pezas para parques eólicos e as estruturas navais.











