O programa de visitas escolares da Torre de Hércules recibiu máis de 3.000 alumnos

Un total de 3.075 alumnos visitaron a Torre de Hércules desde o pasado mes de setembro dentro do programa de visitas guiadas organizado polo Concello, a través do Consorcio de Turismo que dirixe Luisa Cid, para promocionar entre os estudantes o coñecemento do monumento, Patrimonio da Humanidade desde 2009.

Ata o momento, máis de medio centenar de colexios e institutos inscribíronse no programa, que conta co respaldo do Ministerio de Educación mediante a distribución de unidades didácticas sobre a Torre de Hércules que se facilita aos docentes para que poidan organizar actividades que estimulen a imaxinación e a vinculación coa Torre de Hércules, especialmente no caso de centros educativos da Coruña e a súa contorna.

Aínda que a maioría dos estudantes son coruñeses e do resto de Galicia, as visitas tamén atraeron a atención de centros escolares doutras comunidades autónomas como Asturias e Castela e León. En canto aos centros estranxeiros, ata o pasado 24 de abril visitaran o monumento 470 nenos e mozos dun total de dez centros educativos, a maioría deles franceses.

As visitas escolares impulsadas polo Consorcio de Turismo arrincaron o pasado setembro, co inicio do curso lectivo, e finalizarán o próximo mes de xuño. Trátase de visitas personalizadas onde os alumnos reciben detallada información histórica da Torre de Hércules e do parque escultórico. As fichas didácticas están deseñadas, ademais, para que se poidan incorporar ás bibliotecas dos centros educativos participantes.