O pleno de Cangas aproba por unanimidade unha moción en defensa dos xulgados

Hoxe ás 20.00 tivo lugar unha nova sesión do Pleno da Corporación Municipal na Casa do Concello correspondente ao mes de abril e na que foi aprobada por unanimidade unha moción conxunta dos grupos políticos con representación na corporación na que “se traslada ao Ministerio de Xustiza o rexeitamento do Pleno do Concello de Cangas ao anteproxecto da Lei de reforma da Lei Orgánica do Poder Xudicial ao recoller a supresión do Partido Xudicial de Cangas así como remitir o presente acordo á Vicepresidencia, Consellería de Presidencia, Administracións Públicas e Xustiza” da Xunta de Galicia. No documento destácase que esta reforma suporía a supresión do Partido Xudicial suporía un grave prexuízo social e económico para as poboacións de Cangas, Moaña e Vilaboa, “cunha área de poboación superior aos 50.000 habitantes, porque afastaría a Administración dos administrados, cando a acción política debe ter como obxectivo todo o contrario”. Neste sentido tamén sinálase o enorme esforzo realizado pola propia administración para a dotar aos xulgados cangueses da infraestructura e persoal necesarios  para atender a máis de 10.000 casos cada ano.

Ademais de abordar este punto, durante a primeira parte da sesión plenaria abordáronse os primeiros puntos da orde do día procedéndose a aprobación da acta da última sesión  así como a dar conta das resolucións de alcaldía dictadas ata o pasado 22 de abril, dos marcos orzamentarios 2014-2017, do informe de seguimento do Plan de Axuste, da execución do cuarto trimestre do orzamento municipal do exercicio 2013 así como do informe sobre o cumprimento dos prazos previstos no pago das obrigacións das entidades locais relativo ao primeiro trimestre do 2014.

Por último debatéronse tres mocións do Bloque Nacionalista Galego (BNG) sobre o “apoio e recuperación da festa local ‘Cangas 1617’ ”, de “apoio aos profesores que imparten cursos Celga” que non saíron adiante cos votos en contra do equipo de goberno local e sobre a “revisión da facturación polo consumo eléctrico municipal de Gas Natural- Fenosa”. Ningunha delas saíu adiante cos votos en contra do equipo de goberno local que explicou, no debate da última moción, que xa se está a desenvolver unha traballo por parte dos servizos municipais de revisión da facturación así como un estudo sobre posibles medidas de aforro entre outras actuación polo cal non ían a apoiar a moción “por tardía”. Tamén foron debatidas dúas mocións presentadas pola formación Alternativa Canguesa de Esquerdas (ACE) para “declarar Cangas vila libre de circos con animais” e “sobre a desafectación dos terreos de Massó”, ambas foron aprobadas cos votos das formacións da oposición e a abstención do equipo de goberno e por unanimidade respectivamente. Hai que sinalar que na última moción houbo unha emenda de substitución do acordo na que solicitábase que o presidente de Autoridade Portuaria explicase aos membros da Corporación Municipal durante o próximo mes de maio as actuacións previas que se van a facer na zona da antiga fabrica de Massó antes de que os terreos pasen a titularidade municipal. Modificación que permitiu o consenso entre todos os grupos municipais.

Rogos e preguntas

Por último realizouse unha quenda de rogos e preguntas nas que os voceiros dos grupos municipais cuestionaron sobre diversas cuestións como as xestións sobre a horta urbana de A Choupana, actuacións realizadas entorno ao mal estacionamento de vehículos na vila, sobre a posta en marcha de transporte marítimo cara as praias ou a necesidade de realizar novas xuntanzas para traballar sobre o PXOM entre outras e que foron respondidas polos membros do equipo de goberno informando sobre as xestións realizas ata o momento.