O edil de Ferrol, Pablo Cal Martínez, comparece na Comisión de Seguridade Viaria da Cámara de Galicia

O concelleiro de Seguridade e Mobilidade do Concello de Ferrol, Pablo Cal Martínez, compareceu hoxe na Comisión de Seguridade Viaria do Parlamento de Galicia onde deu conta dos resultados doú último exercicio do plan de seguridade posto en marcha pola Administración municipal neste mandato. O obxectivo deste programa municipal é incrementar as tarefas preventivas e reducir os sinistros.

Cal Martínez detallou ante os deputados autonómicos membros da comisión de traballo da Cámara galega os programas mensuais levados a cabo pola Policía Municipal de Ferrol ao longo do pasado ano 2013. Estes foron: control de velocidade, alcoholemia e drogas; vixilancia do uso do teléfono móbil, caso, cinto de seguridade e sistemas de retención infantil; supervisión de documentación; control de estacionamentos irregulares e perigosos; campaña de seguridade peonil; control do transporte escolar e sinalización e conservación viaria.

O edil ferrolán explicou que para facer todos estes plans de intervención, o Goberno Municipal creou unha unidade específica de Seguridade Viaria que conseguiu reducir o número de sinistros no municipio, pasando dos 1.565 rexistrados no ano 2010 aos 1.320 que se produciron o exercicio pasado. Así mesmo, Cal Martínez fixo fincapé ante os membros da Comisión do Parlamento de Galicia da importancia de incrementar as labores de prevención; e ao respecto, apuntou que no caso do Concello de Ferrol esta parte fundamental do traballo dos axentes locais aumentou un 30% en 2013 en relación coa anualidade de 2012.

Maior presenza na rúa

O responsable da Concellería de Seguridade e Mobilidade do Concello de Ferrol agradeceu especialmente o traballo dos membros da Policía Local que participan nos diferentes programas do Plan Municipal de Seguridade Viaria. “O esforzo e profesionalidade dos policías locais, as campañas de educación viaria, e a maior presenza nas rúas coa creación da nova Unidade de Seguridade Viaria e o programa do Plan de Barrios”, manifestou Cal Martinez.