O Concello de Cedeira informa das axudas para contratar Internet de banda larga vía satélite

O Concello de Cedeira informa da apertura do prazo para presentar as solicitudes á convocatoria de axudas para contratar Internet de banda larga vía satélite destinadas a fogares e pemes das zonas con máis dificultades de cobertura de toda a Comunidade.

Un programa, impulsado pola Xunta, para achegar a banda larga a fogares e pemes que non dispoñan de acceso á banda larga de cando menos 2Mbps, mediante outra tecnoloxía. O Concello, a través da axente de Desenvolvemento Local, informará de luns a venres, de 9 a 14 horas, a todas aquelas persoas interesadas neste servizo. Para isto, tan só deben dirixirse á pranta baixa da casa consistorial nas xornadas e horarios citados.

As axudas tramitaránse a través de cinco empresas acreditadas como entidades colaboradoras pola Xunta (Duo Telecom, Eurona, Intermax, Quantis e Terrachá Technoloy) e o prazo de presentación de solicitudes remata o próximo 30 de agosto. O programa establece unha única subvención por enderezo destinada a sufragar os gastos de instalación así como o custo do equipamento do interior da vivenda ou empresa preciso para distribuír a sinal de banda larga, cunha contía máxima de 150 euros e condicionado á contratación dun servizo de cando menos 2Mbps cun período de permanencia de doce meses.

As entidades colaboradoras ofrecen servizos de internet vía satélite de ata 20Mbps de velocidade de baixada ao abeiro desta convocatoria. A alta de liña e o importe da tarifa do primeiro mes será asumido pola entidade colaboradora e, por tanto, gratuíto para os beneficiarios. Os interesados en acceder a estas subvencións deberán contratar o servizo con algunha das cinco entidades colaboradoras acreditadas pola Xunta.