‘Máis que comercio!’ elixe á perfumería Neobel de Vigo como o establecemento favorito do barrio vigués

Bravo Bosh na entrega do diploma ao establecemento Neobel

Os participantes na iniciativa Centros Comerciais Abertos. Máis que comercio!, que se desenvolveu durante todo o mes de marzo nos establecementos asociados ao CCA do barrio vigués do Calvario elixiron como o seu comercio favorito a perfumería e parafarmacia Neobel situada na rúa Urzáiz.

Este negocio, que conta con catro establecementos en Vigo, foi o que máis clics recibiu en www.maisquecomercio.com, web na que os clientes podían participar nun xogo en liña por cada 5 euros de compra e optar a diferentes premios ao tempo que elixían ao seu comercio preferido. A participación nesta iniciativa no centro comercial aberto do Calvario foi elevada, chegando a rexistrarse un total de preto de 4.000 xogadas.

A directora xeral de Comercio, Sol Vázquez Abeal, que xunto coa delegada da Xunta en Vigo, María José Bravo Bosch, foi a encargada de entregar o diploma ao establecemento máis votado, así como os agasallos conseguidos polos clientes, salientou que ademais de poñer en valor o traballo dos centros comerciais abertos, Máis que comercio!, ten por obxectivo resaltar os valores do comercio de proximidade, como son a calidade, o trato ao cliente ou a variedade.

A iniciativa, que percorrerá os centros comerciais abertos de Galicia durante todo o ano, desenvólvese cada mes en CCA diferentes, e neste mes de abril está a celebrarse nos CCA de Tomiño, Santiago Centro, Obelisco da Coruña, e O Grove.