A Asociación Libera ve unha barbaridade que a Xunta permita a caza de cabras montés no Parque Natural Baixa Limia-Xurés

A Asociación Animalista Libera cualificou de “sobrada barbaridade” o anuncio da Xunta de permitir a caza de varias cabras montés no Parque Natural da Baixa Limia-Serra do Xurés baixo o argumento de que a especie “se estaría a recuperar”.

   Nun comunicado, a asociación explicou que esta especie, cualificada como “vulnerable” na lista vermella de especies ameazadas que a Unión Internacional para a Conservación da Natureza confecciona de forma periódica, foi “reintroducida na comunidade hai menos dunha década”.

   Neste sentido, Libera! considerou que o anuncio do Goberno galego responde ás “presións do lobby procaza” que durante os últimos anos “pretendían flexibilizar as batidas” en ámbitos protexidos”.

   Ante estas cuestións, avanzou que presentará diferentes iniciativas para “impedir” que os plans da Xunta “saian adiante”, ao entender que “non existe xustificación ningunha para tirotear 13 seres vivos silvestres baixo criterios meramente economicistas”.

   Para a Asociación Animalista Libera o “uso e abuso” dos ámbitos naturais e os seus habitantes por parte da administración autonómica, “da man sempre dos cazadores, rompe coa equidistancia que deberían manter os poderes públicos, xa que o 99% da cidadanía de Galicia non é cazadora nin exerce esta actividade”.

   Por último, augurou que a “cabra montés rematará nun parque zoolóxico como exhibición da pésima defensa que as administracións fixeron do seu mantemento”, “posibilitando que a caza deste animal se converta nun reclamo económico e fomentando a destrución da biodiversidade como trofeo”.