Inícianse en San Sadurniño as obras de urbanización do contorno do Pazo da Marquesa

Quen entre no centro urbano de San Sadurniño vindo do lado de Ortigueira ha notar algo cambiado o contorno do Pazo e do edificio anexo. É máis, seguramente verá mellor os dous edificios, despois de que unha escavadora acabase de tirar os muros a medio caer da antiga queixería. Este luns comezaron os traballos de urbanización da zona, que prevén construír un aparcadoiro e adecentar os arredores do Pazo despois de meses de obras.

Construcciones Guerreiro Somozas S.L. é a encargada de acondicionar o recinto tras lograr o contrato cunha oferta lixeiramente superior aos 60.000 euros e un prazo de execución de dous meses. As actuacións programadas buscan mellorar a accesibilidade e o aspecto do espazo común que rodea o Pazo da Marquesa e o edificio anexo.

A solución técnica recolle a construción dun aparcadoiro na zona leste do antigo colexio das monxas lindando coa estrada de Ortigueira e coa de Ferreira. Os planos reflicten unha área de estacionamento con capacidade para 35 vehículos que lle dará servizo aos dous edificios públicos e que, ao mesmo tempo, axudará a desconxestionar as beiravías do centro urbano.

Canda esta intervención, a segunda grande parte do proxecto céntrase na urbanización do perímetro do edificio anexo e máis do Pazo. Os accesos comúns irán enlousados mentres que a parte sur da zona nova levará unha área vexetal que sirva de conexión cos xardíns do Pazo.

O Concello busca deste xeito recuperar todo o contorno inmediato da futura casa consistorial que se viu afectado por meses de traballos nos dous edificios. De feito, a urbanización suporá na práctica o remate das intervencións exteriores en todo o conxunto arquitectónico.

De momento as obras finánzanse integramente con fondos municipais. Con todo, o Concello agarda sufragar parte do custe por medio das axudas autonómicas para a mellora de infraestruturas públicas.