Entréganse os primeiros expedientes dixitais na que é a posta en marcha do proxecto E+D

O edil de Urbanismo mantivera a mediados do mes de febreiro unha reunión cos estudos técnicos de arquitectura locais para informarlles das medidas de modernización que en materia de urbanismo se está traballando desde o dito departamento

O concelleiro de Urbanismo, Román Rodríguez, fará entrega o vindeiro mércores día 30 de abril, dos primeiros tres expedientes urbanísticos en formato dixital -que se corresponden cos procedementos tramitados e rematados nos que o solicitante presentou a documentación do proxecto en formato dixital- no qué é a posta en marcha do proxecto E+D (Expediente Dixital), co que se trata de facilitar unha maior transparencia, axilización da tramitación, seguridade xurídica e aforro económico para os solicitantes e para a administración.

Hai que lembrar que o edil delegado de Urbanismo e tenente de alcalde mantivera a mediados do mes de febreiro unha reunión cos estudos técnicos de arquitectura locais para informarlles das medidas de modernización que en materia de urbanismo se está traballando desde o dito departamento.

No dito encontro no que tomaron parte ademais dos consultings redactores de proxectos técnicos os responsables técnicos de Urbanismo, Román Rodríguez anunciou a posta en marcha do Expediente Dixital no ámbito das licenzas e títulos habilitantes, unha das novidades que contempla a Lei 9/2013 do emprendemento e da competitividade.

ELABORADOS INTEGRAMENTE DE XEITO DIXITAL

Rodríguez explica que “os expedientes dixitais que entregaremos a vindeira semana nun lapis de memoria serán os primeiros confeccionados integramente de xeito dixital, tanto no que atinxe á documentación achegada polos particulares como aos documentos elaborados polo persoal do servizo de Urbanismo”. “A partir de agora iremos entregando de xeito progresivo todos os expedientes en formato dixital, a medida que estean aprobados, a fin de ir xerando unha cultura dixital que reduza trámites e que supoña medidas de aforro económico para os veciños e para a administración”, sinala.